Thursday, November 19, 2015

အနီရောင် ငြိမ်းချမ်းရေး


    အနီရောင်ဟာ ငြိမ်းချမ်းခြင်းရဲ့ သင်္ကေတဖြစ်တယ်။ အမှတ်တံဆိပ်ဖြစ်ပါတယ်။ ပြီးခဲ့တဲ့ ရက်အနည်းငယ်က မြန်မာနိုင်ငံအဝှမ်းမှာ အနီရောင်လွှမ်းသွားတယ်။ ဒါဟာ ငြိမ်းချမ်းခြင်းရဲ့ အစလို့ဆိုရမှာ ဖြစ်ပါတယ်။ ဘာဖြစ်လို့ အနီရောင်ဟာ ငြိမ်းချမ်းမှုရဲ့ သင်္ကေတလို့ဆိုရတာလဲဆိုတော့ အကြောင်းမဲ့ဆိုလိုက်ခြင်း မဟုတ်ပါဘူး။ ကျမ်းဂန် အထောက်အထားနဲ့ပဲ အနီရောင်ဟာ ငြိမ်းချမ်းခြင်းရဲ့ သင်္ကေတဖြစ်ကြောင်းကို ရှင်းပြလိုပါတယ်။

    အရှင်အနုရုဒ္ဓါမထေရ်မြတ် စီရင်ထားခဲ့တဲ့ အဘိဓမ္မတ္ထသင်္ဂဟကျမ်းဆိုတာ ဗုဒ္ဓဘာသာဝင်တိုင်း သိပါတယ်။ ပရမတ္ထတရားတွေရဲ့ သဘောလက္ခဏာကို သူ့အခန်းနဲ့သူ စနစ်တကျစီရင်ထားတဲ့ ကျမ်းဖြစ်ပါတယ်။ မြန်မာတွေက တော့ သဂြိုဟ်ကျမ်းလို့ ခေါ်ခဲ့ကြပါတယ်။ ဒီကျမ်းဟာ အမှန်တကယ်အားဖြင့် အရှင်အနုရုဒ္ဓါ့မထေရ်ရဲ့ အာဘော်
များမဟုတ်ပါဘူး။ မြတ်စွာဘုရားရှင် ဟောကြားတော်မူခဲ့တဲ့ အဘိဓမ္မာ(၇)ကျမ်းထဲကနေ ထုတ်နှုတ်ပြီးတော့ စိတ်, စေတသိက်, ရုပ်, နိဗ္ဗာန်ဆိုတဲ့ ပရမတ္ထတရားတွေကို သူ့နေရာသူ စနစ်တကျကို ကဏ္ဍအလိုက် တင်ပြထားတဲ့ကျမ်း ဖြစ်ပါတယ်။ ဒီကျမ်းမှာ အခန်း(၉)ခန်းနဲ့ တင်ပြထားပါတယ်။ စိတ်ပိုင်း၊ စေတသိက်ပိုင်း၊ ပကိဏ်းပိုင်း၊ ဝီထိပိုင်း၊ ဝီထိမုတ်ပိုင်း၊ ရုပ်ပိုင်း၊ သမုစ္စည်းပိုင်း၊ ပစ္စည်းပိုင်း၊ ကမ္မဋ္ဌာန်းပိုင်းဆိုပြီး အပိုင်း(၉)ပိုင်းနဲ့ ကျစ်ကျစ်လစ်လစ် စီရင် ထားတဲ့ ကျမ်းဖြစ်ပါတယ်။ ဒီထဲက နောက်ဆုံးအပိုင်းဖြစ်တဲ့ ကမ္မဋ္ဌာန်းပိုင်းကို ကိုးကားပြီးတော့ အနီရောင်ဟာ ငြိမ်းချမ်းရေးရဲ့ သင်္ကေတဖြစ်တယ်ဆိုတာကို ပြောဆိုလိုက်ခြင်း ဖြစ်ပါတယ်။

    ကမ္မဋ္ဌာန်းပိုင်းမှာလည်း ကဏ္ဍနှစ်ခုခွဲပါတယ်။ သမထကမ္မဋ္ဌာန်းနည်းနဲ့ ဝိပဿနာကမ္မဋ္ဌာန်းနည်းဆိုပြီးတော့ ခွဲခြားထားခြင်းဖြစ်ပါတယ်။ ဒီထဲကမှ သမထကမ္မဋ္ဌာန်းနဲ့ ပတ်သက်ပြီးတော့ ကမ္မဋ္ဌာန်း(၄ဝ)ရှိကြောင်း ထုတ်ပြ ထားပြီးတော့ ဒီကမ္မဋ္ဌာန်းတွေကို စရိုက်အားလျော်စွာ ဝေဖန်ထားတဲ့ကဏ္ဍတစ်ခုလည်းပါဝင်ပါတယ်။ ဒီနေရာမှာ လူသားများအနေနဲ့ စရိုက်(၆)မျိုးရှိကြောင်း ပြောပါတယ်။ ဒါကတော့ ရာဂစရိုက်, ဒေါသစရိုက်, မောဟစရိုက်, သဒ္ဓါစရိုက်, ဗုဒ္ဓိစရိုက်, ဝိတက်စရိုက်ဆိုပြီး ခြောက်မျိုးထုတ်ပြပါတယ်။

    စရိုက်ဆိုတဲ့စကားလုံးဟာ မြန်မာတွေရဲ့ နားနဲ့ ရင်းနှီးနေတဲ့စကားလုံးပါပဲ။ ဒီကောင်က စရိုက်မကောင်းဘူး၊ စရိုက်ကောင်းတယ်ဆိုပြီးတော့ သုံးနှုံးကြခြင်း ဖြစ်ပါတယ်။ ဒါကိုပဲ ညာဉ်ဆိုတဲ့စကားအဖြစ်လည်း သုံးတတ်ကြပါတယ်။ ဆိုတော့ ဒီလိုစရိုက်(၆)မျိုးကို တစ်ခုမဟုတ်တစ်ခု ပိုင်ဆိုင်ထားခဲ့ကြတဲ့ လူသားတွေအနေနဲ့ တရားဘာဝနာ အားထုတ်လိုရင် သူစရိုက်နဲ့ သင့်လျော်မယ့်ကမ္မဋ္ဌာန်းကို ပေးရပါတယ်။ ဒါမှသာ ပိုမိုပြီးတော့ ထိရောက်သောကြောင့် ဖြစ်ပါတယ်။ ဒီထဲကမှ ဒေါသစရိုက်ကြီးတဲ့ပုဂ္ဂိုလ်(ဒေါသကြီးတဲ့ပုဂ္ဂိုလ်)အတွက် အထူးသဖြင့် သင့်လျော်တဲ့ကမ္မဋ္ဌာန်း ကို ထုတ်ပြတဲ့အခါမှာ အရောင်ကသိုဏ်းလို့ခေါ်တဲ့ ကသိုဏ်းလေးမျိုးနဲ့ သင့်လျော်ကြောင်း၊ ဒေါသကြီးတဲ့သူကို အရောင်ကသိုဏ်းလေးမျိုးတည်းက တစ်ခုမဟုတ်တစ်ခု ပေးပြီး ကမ္မဋ္ဌာန်းအာရုံယူပြီးတော့ အားထုတ်စေဖို့အတွက် ထုတ်ပြထားခြင်း ဖြစ်ပါတယ်။

    ဒေါသဆိုတာ မေတ္တာရဲ့ဆန့်ကျင်ဘက်ပါ။ မေတ္တာဆိုတာက ငြိမ်းချမ်းခြင်းရဲ့ အဓိကတရားပါ။ ဒါကြောင့် ဒေါသကြီးနေတဲ့သူကို ငြိမ်းချမ်းစေဖို့အတွက် နီလကသိုဏ်း(အညို)၊ ပီတကသိုဏ်း(ရွှေသောအဆင်း) လောဟိတကသိုဏ်း(အနီ)၊ သြဒါတကသိုဏ်း(အဖြူ)ဆိုတဲ့ အရောင်ကသိုဏ်းလေးမျိုးထဲက လောဟိတ-လို့ခေါ်တဲ့ နီတဲ့အရောင်ကို ကမ္မဋ္ဌာန်းအာရုံအဖြစ်ယူပြီးတော့ ရှုမှတ်ပွားများဖို့၊ ဒေါသကြီးသူအတွက် အနီရောင်ဟာလည်း သင့်လျော်ကြောင်း ကမ္မဋ္ဌာန်းတွေကို စရိုက်နဲ့ဝေဖန်တဲ့အခါ ဒေါသစရိုက်ဆိုတဲ့ မငြိမ်းချမ်းသူကို ငြိမ်းချမ်းစေဖို့အတွက် အနီရောင်ကို ပွားများစေဖို့ တိုက်တွန်းထားတာကြောင့် အနီရောင်ဟာ မေတ္တာဆိုတဲ့ ငြိမ်းချမ်းခြင်းရဲ့ ပုံရိပ်၊ သင်္ကေတ လို့ သုံးနှုံးလိုက်ခြင်း ဖြစ်ပါတယ်။

    ကမ္ဘာကြီးဟာ စစ်မက်တွေနဲ့ နေ့စဉ်နဲ့အမျှ မငြိမ်းချမ်းခဲ့ပါဘူး။ အထူးသဖြင့် အရှေ့အလယ်ပိုင်းဒေသဟာ တကယ့်ကို စစ်ဒဏ်သင့်နေတဲ့နေရာဖြစ်နေခဲ့ပါတယ်။ အပြစ်မဲ့ပြည်သူတွေဟာ ကိုယ့်နေရာအသီးသီးမှာ မနေရဲဘဲ အခြားနိုင်ငံတွေဆီကို အသက်နဲ့ရင်းပြီးတော့ ထွက်ပြေးနေခဲ့ရပါတယ်။ ဟိုတလောက ပြင်သစ်နိုင်ငံ ပါရီမှာဆို လောလောလတ်လတ် ပူပူနွေးနွေးအဖြစ် အကြမ်းသမားတွေရဲ့ တိုက်ခိုက်မှုကြောင့် လူတွေရာချီပြီးတော့ အသက်စွန့် သွားခဲ့ကြရပါတယ်။ ဒါဟာ ကြောက်စရာကောင်းတဲ့ လူမဆန်တဲ့လူတွေရဲ့ အကြမ်းဖက်မှုရဲ့ ဆိုးမွေပါပဲ။

    ထိုနည်းတူစွာပါပဲ။ မြန်မာနိုင်ငံဟာလည်း ပြည်တွင်းစစ်အနေနဲ့ အရှည်ကြာဆုံး စံချိန်တင်နိုင်လောက်တဲ့အထိ တစ်ဖက်နဲ့တစ်ဖက် တိုက်ခိုက်နေခဲ့ကြရပါတယ်။ ဒါဟာလည်း ငြိမ်းချမ်းမှုတွေနဲ့ ကင်းကွာနေခဲ့ရတဲ့ စစ်ဘေးသင့် ပြည်သူတွေအတွက် ကြီးမားတဲ့လူသားဘဝ ဆုံးရှုံးမှုပါပဲ။ အခုလောလောဆယ်မှာလည်း ရှမ်းပြည်နယ်မြောက်ပိုင်း မိုင်းနောင်မြို့မှာ အစိုးရတပ်မတော်နဲ့ အက်စ်အက်စ်ပီပီ၊ အက်စ်အက်စ်အေတို့အကြား တိုက်ခိုက်မှုတွေ ပြင်းပြင်းထန် ထန် ဖြစ်ပွားနေခဲ့ပါတယ်။ ထိုနည်းတူစွာပါပဲ၊ ငြိမ်းချမ်းရေးအတွက် လက်မှတ်တွေထိုးထားကြပေမယ့် အခြားတပ် တွေနဲ့လည်း အထိမခံ ရွှေပန်းကန်လိုဖြစ်နေခဲ့ရတဲ့ နေရာတွေလည်း အများကြီးပါပဲ။ ကချင်ပြည်နယ်လိုနေရာမှာလည်း စစ်ဘေးဒုက္ခသည်တွေ ထောင်ချီပြီးတော့ ရှိနေဆဲလည်း ဖြစ်ပါတယ်။

    မြန်မာနိုင်ငံရဲ့အရွှေ့ကတော့ မကြာခင်ကပြီးသွားခဲ့တဲ့ ရွေးကောက်ပွဲရလဒ်ကို ကြည့်မယ်ဆိုရင် လက်ရှိအာဏာ ရပါတီကို နေရာတိုင်းလိုလိုမှာ အတိုက်ခံပါတီက အနိုင်ရထားပါတယ်။ လွတ်လွတ်လပ်လပ်လည်း အစိုးရဖွဲ့နိုင် တဲ့ အခြေအနေကို ရရှိထားပါတယ်။ ဒါကြောင့် မကြာခင်အချိန်မှာ လက်ရှိအစိုးရအဖွဲ့ဟာ အနိုင်ရအတိုက်အခံပါတီ ကို အာဏာလွှဲပြောင်းပေးရတော့မှာ ဖြစ်ပါတယ်။ ဒါကြောင့် ပြောင်းလဲချိန်တန်ပြီဆိုတဲ့ ကြွေးကြော်မှုအတိုင်း အပြောင်း အလဲကို အားလုံးကစောင့်စားနေခဲ့ကြခြင်း ဖြစ်ပါတယ်။ ဒီနေရာမှာ အထက်ကပြောခဲ့တဲ့ အနီရောင်ကိစ္စကို ပြန်ပြော ချင်ပါတယ်။ ဟုတ်ပါတယ်။ သူတို့ဟာ ပြောင်းလဲချိန်တန်ပြီဆိုတဲ့ ကြွေးကြော်သံနဲ့အတူ ပါတီအလံ၊ အမှတ်တံဆိပ် ဟာ အနီရောင်ဖြစ်ပါတယ်။ ဒါကြောင့် အမှန်တကယ်ပြောင်းလဲလိုကြတဲ့ ပြည်သူလူထုအနေနဲ့ ရွေးကောက်ပွဲနေ့တုန်းက (၈ဝ)ရာခှိုင်းနှုံး ၈၀ကျော် မိမိတို့ရဲ့အပြောင်းအလဲအတွက် မဲပေးခဲ့ကြပါတယ်။ အခြားအခြားသော နိုင်ငံတွေကတောင် အတုယူစရာအဖြစ် အသိမှတ်ပြုရတဲ့အထိ ပြည်သူတွေအနေနဲ့ အပြောင်းအလဲအား ဆာလောင်မှုကို ပြသနိုင်ခဲ့ပါတယ်။

    ဆိုတော့ ၂ဝ၁၆ကနေစပြီးတော့ မြန်မာနိုင်ငံဟာ ခေတ်အဆက်ဆက်က အုပ်ချုပ်ခဲ့တဲ့ စနစ်ဆိုးကြီးတွေရဲ့ ဒဏ်ရာဒဏ်ချက်ကို ကုစားပေးတဲ့အနေနဲ့ မငြိမ်းချမ်းခဲ့မှုတွေကို တွန်းလှန်ပြီးတော့ ငြိမ်းချမ်းမှုကို ဖော်ဆောင်နိုင် လိမ့်လို့ အများက မျှော်လင့်ထားခဲ့ကြပါတယ်။ ထိုနည်းတူစွာပါပဲ၊ လူအနည်းစုကသာ ကြီးစိုးချယ်လှယ် လက်ဝါးကြီး အုပ်ထားခဲ့တဲ့ စီးပွားရေးတံခါးတွေလည်း တစ်ချပ်ပြီးတစ်ချပ် ပွင့်လာပြီးတော့ ဖွံ့ဖြိုးမှုဟာလည်း အရှိန်ကောင်းကောင်း နဲ့ ချီတက်လာခဲ့လိမ့်မယ်လို့ မျှော်လင့်ရပါတယ်။ ဒါကြောင့် အနီရောင်လွှမ်းခဲ့တဲ့ ရွှေးကောက်ပွဲကာလ အရောင်ဟာ မြန်မာနိုင်ငံရဲ့ အပြောင်းအလဲ၊ ငြိမ်းချမ်းခြင်း၊ ဖွံ့ဖြိုးခြင်းကို ဖော်ဆောင်ပေးနိုင်လိမ့်မယ်ထို့ ထင်မြင်မိပါတယ်။ ဒါကြောင့် ဒေါသစရိုက်ဆိုတဲ့ မငြိမ်းချမ်းသူအတွက် အထူးသင့်လျော်တဲ့ ကမ္မဋ္ဌာန်းအာရုံအဖြစ် အရောင်လေးမျိုးမှာ အနီရောင်ပါတဲ့အတွက် အနီရောင်ဟာ ငြိမ်းချမ်းခြင်းရဲ့ သင်္ကေတလို့ဆိုရခြင်း ဖြစ်ပါတယ်။ ဒါနဲ့ ပတ်သက်ပြီးတော့ အကြောင်းအရာလေး အနည်းငယ်ကို ပြောပြလိုပါတယ်။

    အထက်ကပြောခဲ့သလို ကမ္မဋ္ဌာန်းဆရာတွေဟာ မိမိထံကိုလာရောက်ပြီးတော့ ကမ္မဋ္ဌာန်းတောင်းလာခဲ့ကြတဲ့ ယောဂီတွေ၊ တပည့်တွေအတွက် သူ့စရိုက်အားလျော်စွာ ကမ္မဋ္ဌာန်းပေးရပါတယ်။ ဒီလိုမဟုတ်ရင် ခရီးမပေါက်ဘဲ ရှိတတ်ပါတယ်။

    တစ်ခါက အရှင်သာရိပုတ္တရာမထေရ်မြတ်ဟာ မ်ိမိရဲ့တပည့်ရဟန်းငယ်လေးတစ်ပါးကို ကမ္မဋ္ဌာန်းအပေးမှား ခဲ့ဖူးပါတယ်။ ဒါကြောင့် ရဟန်းငယ်လေးဟာ လေးလပတ်လုံး တရားအားထုတ်ပေမယ့် ဘာမှဖြစ်မလာခဲ့ပါဘူး။ ဒါကြောင့် မြတ်စွာဘုရားကိုလျှောက်တော့ မြတ်စွာဘုရားက ကမ္မဋ္ဌာန်းအပေးမှားကြောင်း ပြောပြီးတော့ ရဟန်းငယ်ဟာ အရှင်သာရိပုတ္တရာ ထင်သလို လူငယ်ပီပီ ရာဂစရိုက်ကြီးတဲ့သူမဟုတ်ကြောင်း ဘဝငါးရာ ရွှေပန်းထိန်သည်ဖြစ်ခဲ့ ဖူးကြောင်း၊ နီမြန်းတဲ့ရွှေများကို ကြည့်ခဲ့ရတာများကြောင်းပြောပြီးတော့ မြတ်စွာဘုရားရှင်က ရဟန်းငယ်လေးရဲ့ စရိုက်နဲ့ကိုက်ညီအောင် ပဒုမ္မာကြာနီပန်းကို ဖန်ဆင်းပြီးတော့ ကမ္မဋ္ဌာန်းအာရုံအဖြစ်ပေးပြီး ရှုမှတ်ပွားများစေကာ ခဏအတွင်းမှာ ရဟန္တာဖြစ်သွားခဲ့ပါတယ်။ ဒါဟာလည်း အနီရောင်ကမ္မဋ္ဌာန်းရဲ့ အကျိုးကျေးဇူးပါပဲ။ ဒီနေရာမှာ ကမ္မဋ္ဌာန်းဆရာဆိုတာနဲ့ ပတ်သက်ပြီးတော့ အနည်းငယ် ပြောပြချင်ပါသေးတယ်။

    ကမ္မဋ္ဌာန်းပွားများလိုတဲ့သူဟာ မိမိကိုယ်ကို ကမ္မဋ္ဌာန်းဆရာအား အပ်နှံရပါတယ်။ ဒါဟာလေးစားမှု တစ်ခုပါပဲ။ ဒီလိုအပ်နှံလိုက်ခြင်းဟာ ဆရာ့ရဲ့စကားကို နားထောင်လိုခြင်း၊ အပြစ်ပြဆုံးမမှုကို နာခံလိုခြင်း၊ တစ်နေရာ ရာကို သွားလိုသော်လည်း ဆရာ့ကိုပန်ကြားပြီးမှသာ သွားလိုခြင်း၊ ဆရာ့ရဲ့ ချီးမြှောက်မှုကိုလည်း ရလိုခြင်းစတဲ့ မိမိ ကိုယ်ကိုနှိမ့်ချပြီးတော့ ခန္ဓာကိုယ်ကို ဆရာ့အတွက်ဆိုရင်အသက်ပါ ပေးလှူတဲ့အထိ စွန့်လှူခြင်း၊ အပ်နှံခြင်းမျိုး ဖြစ်ပါတယ်။

    ဒီလိုပါပဲ၊ ပါတီအသီးသီးက လူတွေကလည်း မိမိတို့ရဲ့ ပါတီကိုယ်စားလှယ်လောင်းတွေကို ပြည်သူလူထုကို အပ်နှံတဲ့သဘောနဲ့ မိတ်ဆက်ပြသခဲ့ကြပါတယ်။ ဒါဟာလည်း လွှတ်တော်ထဲရောက်ရင် ထင်ရာစိုင်းဝါဒနဲ့ မလုပ်ဘဲနဲ့ မိမိတို့ရဲ့ ကိုယ်စားပြုဒေသအသီးသီး၊ တိုင်းပြည်နဲ့လူမျိုးတို့ရဲ့ ငြိမ်းချမ်းရာ ငြိမ်းချမ်းကြောင်း၊ တိုးတက်ရာ တိုးတက် ကြောင်းစသဖြင့် မိမိစွမ်းနိုင်သည့်အလျောက် ပင်ပန်းဆင်းရဲမှုကို ပဓာနမထားဘဲ အသက်ပါစွန့်နိုင်တဲ့အထိ ပြုလုပ် ပါမယ်လို့ ဝန်ခံထားခြင်းဖြစ်ပါတယ်။ ဒါကြောင့် အနိုင်ရပါတီရဲ့ အနီရောင်ဟာ ငြိမ်းချမ်းမှု၊ သာယာမှု၊ ဝပြောမှု တွေဆီကို ဦးတည်သွားနိုင်ပါစေကြောင့် အနီရောင်ဆိုတဲ့ ငြိမ်းချမ်းမှုရဲ့ အမှတ်သင်္ကေတကို အဓိပ္ပာယ်ရှိရှိ ပုံဖော်သွား နိုင်ကြပါစေကြောင်း တိုက်တွန်းစကားဆိုလိုက်ရပါတယ်။

မောင်မင်းစိုး
Daily Eleven သတင်းစာ(၁၉-၁၁-၂၀၁၅)ကြာသပတေး။

No comments: